Fil-Mużew tal-Knisja Parrokkjali taż-Żejtun, li jinsab biswit il-Knisja Parrokkjali ta' Santa Katarina, insibu diversi xogħlijiet tal-arti relatati mal-parroċċa u l-istorja taż-Żejtun. Il-kolezzjoni f'dan il-Mużew tvarja minn għamara għal skulturi, minn ċeramika u fdalijiet arkeoloġiċi għal pitturi. Fost ix-xogħlijiet tal-arti hemm pittura li turi l-Qtugħ ir-Ras ta' Santa Katarina mpitter mill-Iskola ta' Caravaggio.

Il-Parroċċa taż-Żejtun qed taħdem fuq rotta ta' patrimonju fil-Knisja Parrokkjali għall-viżitaturi. Din ir-rotta se tibda mill-Oratorju tas-Sagrament Imqaddes, u tista' żżur ukoll il-kannierji ta' taħt il-Knisja u s-sagristija, apparti l-Mużew fejn wieħed għadu jista' jara l-Qtugħ ir-Ras ta' Santa Katarina mill-Iskola ta' Caravaggio.