L-1942 kient l-agħar sena tat-Tieni Gwerra Dinjija fuq Malta, peress li n-Nazzisti u l-Faxxisti li kienu bbażati fi Sqallija wettqu numru kbir ta' air raids fuq Malta. Fl-għodwa tat-2 ta' Mejju, bomba anti-personnel, li twadbet minn Junker 88, ġiet direttament fuq iz-zuntier tal-Knisja Parrokkjali u splodiet mal-impatt. Hekk kif diversi nies kienu qed jiġri biex isibu kenn fil-Knisja Parrokkjali l-bomba ħasdet il-ħajja ta' 27 persuna.

Il-faċċata tal-Knisja Parrokkjali għadha turi ċ-ċikatriċi mill-blast tal-bomba. Il-mafkar tal-vittmi tal-gwerra fil-pjazza taż-Żejtun iġorr l-ismijiet tal-vittmi tal-gwerra li ħallewna fit-traġedja ta' dan il-jum partikolari.