L-Oratorju hu mibni fuq arkitettura Barokka. Il-faċċata sabiħa li għandu hija msaħħa b'tieqa fuq żewġ kolonni li nsibu fuq kull naħa tal-bieb prinċipali. Fuq it-tieqa hemm stema tal-ġebel miżmuma minn żewġ anġli tal-ġebel li qed turi l-emblema tal-Ewkaristija Mqaddsa. Fuq l-istema hemm tieqa tonda u aktar 'il fuq minnha nsibu l-kampnar li hu mżejjen minn fjammi tan-nar magħmula fil-ġebel fuq kull naħa tiegħu. F'dan l-Oratorju li nbena fis-seklu 18 insibu numru ta' kapulavuri artistiċi bħal 6 pitturi ta' Francesco Zahra, u 2 pitturi ta' Tusè Busuttil, apparti l-Kwadru Titulari tal-1759 li juri l-Istituzzjoni tal-Aħħar Ċena.