Fuq pedestall għoli tal-ġebel, insibu salib tal-injam monumentali, li huwa xhieda tal-kuraġġ li wrew  l-irġiel Żwieten. Il-Franċiżi, taħt Napuljun, li ħakmu lil Malta fl-1798, wassal biex wara tliet xhur biss il-Maltin qamu kontra l-Franċiżi u ġellgħhom jmorru għall-kenn wara l-fortifikazzjonijiet tal-Belt Valletta u l-Kottonera.

F'wieħed mill-attakki fuq l-għadu ħdejn il-Forti tas-Salvatur, iż-Żwieten wara li qatlu l-ftit suldati Franċiżi li kien hemm moħbija f'Villa Bighi, irnexxilhom li jieħdu minn taħt idejn il-Franċiżi s-salib il-kbir tal-injam li kien hemm wieqaf fuq iz-zuntier ta' quddiem il-Kunvent tal-Kapuċċini, li dak iż-żmien kien abandunat, fil-Kalkara. Wara waqqfu dan it-trofew tar-rebħa fuq il-Franċiżi fil-pjazza ewlenija taż-Żejtun bħala tifkira ta' din il-ġrajja għall-ġenerazzjonijiet futuri.