Bħala ċentru ta' devozzjoni lejn il-Madonna tad-Duluri, fiż-Żejtun, insibu l-knisja tal-Madonna tal-Ħniena, fl-inħawi ta' Bir id-Deheb. Fl-1575 f'dan il-post kienet diġà teżisti knisja, iżda fl-1618 l-Isqof Cagliares ordna li din għandha tingħalaq. Iżda tliet snin wara l-Isqof reġa' fetaħ din il-knisja, fejn ġiet iddedikata lil Santa Marija, iżda taha t-titlu tal-Madonna tal-Ħniena. Matul ir-raba Ħadd ta' Settembru l-parruċċani tal-irħajjal ta' Bir id-Deheb jorganizzaw festa ddedikata lill-Madonna, fejn issir purċissjoni matul it-toroq li jiffurmaw parti minn dan l-irħajjal.